تیمەكانی خۆپاراستنی تەندروستی لە گەرمیان 12 هەڵمەتی دەرمانرێژكردن ئەنجام دەدەن
جی نیوز
بەڕێوەبەرایەتی خۆپاراستنی تەندروستی گەرمیان، بەمەبەستی لەناوبردنی ئەو مێشوو و مێروانەی زیانبەخشن، 12 هەڵمەتی دەرمان رشتن ئەنجام دەدات و لەنێویاندا تەواوی گەڕەكەكانی ناحیەكانی پێباز و رزگاری دەرمانرێژ دەكەن.
محەمەد مەدحەت، بەرپرسی بەشی نەخۆشییە گوازراوەكان لە بەڕێوەبەرایەتی خۆپاراستنی تەندروستی گەرمیان كە سەر بە بەڕێوەبەرایەتی گشتی تەندروستی گەرمیانە، بە gnewsی راگەیاند : لەماوەی مانگی رابردوودا “مانگی ئایار” تیمەكانمان 12 هەڵمەتی دەرمان و دوكەڵرێژكردنی “رش = بە عەرەبی”ئەنجامداوە لە قەزای كەلار و ناحیەو گوندەكانی دەوروبەری. رونیشیكردەوە: لەو میانەدا، بەشی زۆری گەڕەكەكانی كەلار و تەواوی گەڕەكەكانی ناحیەكانی رزگاری و پێباز، دەرمانرێژكراون.
بەوتەی ناوبراو، ئامانج لەم هەڵمەتە، لەناوبردنی ئەو مێشوولەو مێرووە زیانبەخشانەیە، كە مەترسییان هەیە لەوەی نەخۆشی بگوازنەوەو زیان بە تەندروستی مرۆڤ بگەیەنن.
محەمەد مەدحەت، ئەوەشی رونكردەوە: بەشێكی زۆر لە حاویە و زبڵدان و شوێنەكانی فڕێدانی پاشەڕۆیان دەرمانڕێژ كردووە، ئەمە سەرباری قەسابخانەكان و ئەو ئۆتۆمبیلانەی كە كاری كۆكردنەوەی خاشاكیان پێدەكرێت.