دوای بڕیاردان لە خەرجكردنی دەرماڵە بۆ هاوسەر و منداڵانی شەهیدان و ئەنفالكراوەكان، وتەبێژی وەزارەتی شەهیدان رایدەگەیەنێت كە ئەم مانگە ئەو دەرماڵەیە خەرجدەكرێت.
فوئاد عوسمان وتەبێژی وەزارەتی شەهیدان و كاروباری ئەنفالكراوەكان بەgnewsی راگەیاند: دوای دەرچوونی بڕیاری خەرجكردنی دەرماڵە بۆ هاوسەر و منداڵی شەهیدان و ئەنفالكراوەكان لەلایەن ئەنجومەنی وەزیرانی حكومەتی هەرێمەوە، وەزارەتی شەهیدان لەڕێگەی بەڕێوەبەرایەتییە گشتییەكانییەوە دەستیكرد بە رێكخستنی ئەو دەرماڵەیە، بۆئەوەی بەزووترین كات ئەو دەرماڵەیە لەگەڵ موچەی مانگانەدا خەرجبكرێت،
وتیشی: لەئێستادا لیستەكان رێكخراوە و بڕیارە لە 1-7 دا ئەو دەرماڵەیە بەسەر یەكەوە بۆ وارسی شەهیدان و ئەنفالكراوەكان خەرجبكرێت، بڕی دەرماڵەكەش بۆ خێزانی شەهیدو ئەنفال 50 هەزار دینارە، بۆ منداڵیش بڕەكەی 10 هەزار دینارەو دەرماڵەكەش لە 1-1-2012 ـەوە ئەژمار كراوە.
وتەبێژەكەی وەزارەتی شەهیدان باسی لەوەشكرد كە نزیكەی 70 هەزار وارسی شەهید و ئەنفال مانگانە موچەیان لەلایەن وەزارەتی شەهیدانەوە بۆ خەرجدەكرێت.