تۆپێك بازه‌ ‌

+ كه‌واته‌ هیچ.. با بڕۆم.. ویش كه‌ گه‌رمه‌ خوایه‌.

-ده‌ وه‌ره‌ ژوورێ‌ با فێنكت بكه‌مه‌وه‌ رۆڵه‌.

+ به‌چی‌ فێنكم ئه‌كه‌یته‌وه‌؟ خۆ دوكانه‌كه‌ت پانكه‌یه‌كیشی‌ تیا نییه‌.

-تۆ وه‌ره‌، هه‌قت نه‌بێ. ئه‌تكه‌مه‌ ژێر پیاڵه‌یه‌كه‌وه‌و فووت لێ‌ ئه‌كه‌م.

+ ماشه‌ڵڵا كه‌ قسه‌ت خۆشه‌..

-عه‌ینه‌ن معامه‌له‌كه‌ی جه‌نابت..

+ بۆچی‌ خاڵه‌گیان معامه‌له‌كه‌ی من خوا نه‌خواسته‌ چییه‌تی؟

-ئه‌ی‌ ئه‌وه‌ نییه‌ بۆ تۆپێك بازه‌ی حیز داوای وه‌سڵ‌و مۆرم لێ‌ ئه‌كه‌یت؟!

+ ده‌ستم خۆشبێت.. هه‌موو شتێك پێویسته‌ به‌پێی‌ قانون‌و ته‌علیمات بێ.

-قانون‌و ته‌علیمات ئه‌فه‌رموون چی‌؟

+ ئه‌فه‌رموون هه‌ر قوزه‌ڵقورتێكت بۆ دائیره‌یه‌كی حكومی كڕی پێویسته‌ وه‌سڵی‌ له‌گه‌ڵدابێت‌و وه‌سڵه‌كه‌ش مۆركرابێت.

-له‌به‌رچی‌؟

+ له‌به‌رئه‌وه‌ی مه‌جالی‌ قاچ‌وقوچی‌ تیا نه‌مێنێ.

-باوكی من ئه‌و تۆپه‌ بازه‌یه‌ هه‌ر هه‌مووی بایی چل‌و سێ‌ هه‌زاری‌ علوجه‌. دزی له‌كوێ ئه‌كرێ؟! ئه‌مه‌یه‌ ئه‌ڵێ‌ چۆله‌كه‌ خۆت چیت‌و گۆشتاوت چییه‌؟

+ ئه‌م قسانه‌ فایده‌ی نییه‌.. مۆرت هه‌یه‌ لێت ئه‌كڕم، مۆرت نییه‌ خواحافیز.

-بڕۆ خوا حافیزت بێ، به‌ڵام با یه‌ك قسه‌ت بۆ بكه‌م ئه‌وه‌نده‌ی تۆزێ.

+ فه‌رموو.

-تڕحێو له‌خۆیه‌وه‌ دانه‌هاتووه‌..

+ یه‌عنی‌ چی‌؟

-یه‌عنی حوكمه‌ت بایی ملیاردها دینارو دۆلار ئاڵتم‌و ساڵتم به‌كه‌ل‌وپه‌لی‌ بێمۆره‌وه‌ ئه‌كات، ئیتر تۆپێك بازه‌ی سه‌گباب ئه‌م هه‌موو راوه‌ رێوییه‌ی بۆچییه‌؟

‌